雖然寫完馬經，這兒十世冇更新，無他，西班牙贏歐國盃令小弟意興闌珊也，三屆大賽淘汰賽階段未失一球，係好燃勁，但點解世盃決賽洛賓單刀唔入？點解今年四強C朗末段必入球飛天？點解呢兩條友要咁、咁、咁廢？？？

股市近期數度出擊都損手，買上買落都輸，純因貪心之過，一早知道只要買領匯、中移動等天下最穩之貨，學曾淵滄話齋，話之你上落一萬點。去年笨七地放了領匯，幸而買中香港電訊，這隻商業信託究竟有幾多厘息？點都要派完全年息，先知同領匯相比邊隻好。計日後業務增長速度，應差唔多，照預期計，可能電訊息高dd。

十號風球，原來愛倫之後只試過一次，直到周二。香港乃福地，似乎最大的天災不過是颶風，當然，理論上颶風也可以無限勁，同意某些人所言，今次的小災正好喚醒一下嬌生慣養的香港茂利的危機意識，咪再成日望打風放假。

奧運，除了劉翔，冇乜七好睇。四年前，聞說開幕式炒到近十萬，事後看，值得，十萬蚊好多人旅行幾次都用左，震撼卻不會有當日深。即是，四年唔旅行，換睇開幕式，抵。

蝙蝠俠第三集，已看，不及上集是預左，但都是超值、必看。但當然，三集加埋都比不上此導演的潛行凶間。